یومِ اردو کی مناسبت سے ایک نظم‌: اردو زبان

ڈاکٹرمقبول احمد مقبولؔ

وجہہِ تسکینِ جاں ،اے مری راز داں!
تیری الفت میں ہوں آج میں نغمہ خواں
مدح میں تیری، میرا قلم ہے رواں
تیرا علم وادب عاطرو ضوفشاں
میری پیاری زباں ،میری اردو زباں

شان بے مثل ہے تیری تہذیب کی
ہے جہاں پر عیاں تیری شائستگی
حسنِ اخلاق وآداب کی تو پَری
نازشِ عالم وفخرِ ہندوستاں
میری پیاری زباں میری اردوزباں

ساری دنیا میں ہے آج شہرت تری
کیا ہو مجھ سے بیاں شان وعظمت تری
آشکارا ہے سب پر لطافت تری
حسن پر ترے وارفتہ ہے اک جہاں
میری پیاری زباں ،میری اردو زباں

ترے گلشن میں گل ہیں کئی رنگ کے
ان سبھی نے بنایا ہے دلکش تجھے
کوئی غنچہ ہو، خالی نہیں لطف سے
تجھ پہ ہر گز نہ آئے بلائے خزاں
میری پیاری زباں، میری اردو زباں

تیرے نغموں میں ہے درسِ الفت چھپا
امن اور آشتی کا تو روشن دیا
بھائی چارے کی تو نے بنائی فضا
دوستی کا سبب ،ایکتا کا نشاں
میری پیاری زباں ، میری اردو زباں

پیکرِ حسن، اے نازنیں ،گلبدن!
دیکھ کر تیری آن وادا، بانکپن
تجھ پہ شیدا ہوے شیخ اور برہمن
نذر کی سب نے سوغات ِایمان وجاں
میری پیاری زباں ، میری اردو زباں

نصرتیؔ، قطبؔ،وجہیؔ ،سراجؔ و ولیؔ
آتش ؔ وناسخؔ ومومن ؔ ومصحفیؔ
تیری خدمت سے ان کو ملی زندگی
تو نہ ہوتی تو یہ بھی نہ ہوتے عیاں
میری پیاری زباں ،میری اردو زبان

تیرے گلزار کے گل، نسیمؔ وحسنؔ
جن کی خوشبو سے مہکا ہوا ہے چمن
فنِ سوداؔ کا تو بن گئی پیرہن
میرؔ کے درد کی تو بنی ترجماں
میری پیاری زباں، میری اردو زباں

مرثیوں میں ہیں جن کے مراثی نفیس
جن کوکہتے ہیں سب مرثیے کے رئیس
ہاں ،وہی نازشِ فن دبیرؔ وانیسؔ
تو نے بخشا انھیں زور و لطفِ بیاں
میری پیاری زباں ،میری اردو زباں

داغ ؔکے شعر کا سارا لطف ومزہ
فکر غالبؔ کی ،اقبالؔ کا فلسفہ
نثرِ آزادؔ کا گوہرِ بے بہا
یہ سبھی ہم کو تجھ سے ملے بے گماں
میری پیاری زباں ، میری اردو زباں

فکرِ اصلاحِ امت جو سیدؔ کو تھی
ان کے کاموں کا تو واسطہ بن گئی
تجھ سے دنیا تھی رنگین آزادؔ کی

تو ہی شبلیؔ وحالیؔ کی تھی ترجماں

میری پیاری زباں ، میری اردو زباں

ہو رتن ناتھؔ ،ڈپٹیؔ کہ رسواؔ ،شررؔ ۱؎
یا ہو ’’گئودان‘ ‘کا خالقِ معتبر ۲؎
قرۃ ؔومنٹوؔ ، بیدیؔ سے اہلِ ہنر۳؎

آستاں پر ترے ،سب کی پیشانیاں
میری پیاری زباں ، میری اردو زباں

جس کو کہتے ہیں’ ’بابائے اردو‘ ‘سبھی ۴؎
وہ بھی تیرا ہی تھا خادمِ دائمی
ناز اٹھائے ترے، برج موہنؔ نے بھی۵؎
تیری خاطر ہی تھیں ان کی قربانیاں
میری پیاری زباں ، میری اردو زباں

زورؔ ؔ وعرشیؔ وشیرانیؔ وہاشمیؔ۶؎
خوجہ ؔ وقاضیؔ و رامؔ سے عبقری۷؎
گیان چندوؔ رضاؔ وحسنؔ، جالبیؔ۸؎
ان کی تحقیق کی تھی، تو روح ورواں
میری پیاری زباں ،میری اردو زباں

تجھ سے تابندہ ہے نام چکبستؔ کا
جوشؔ نے تجھ سے حاصل کیا ولولہ
تو نے ہم کو دیے ہیں کئی رہنما
تیرا فرزند جوہرؔ سا شعلہ بیاں۹؎
میری پیاری زباں ، میری اردو زباں

یاسِ فانیؔ ،یگانہ ؔ کا رنگِ انا
عشق حسرت ؔ کا ،اصغرؔ کا قلبِ صفا

گلستانِ جگرؔ کی یہ دلکش فضا
تو نے بخشی انھیں شہرتِ جاوداں
میری پیاری زباں ، میری اردو زباں

جذبۂ فیضؔ’ مخدوم ؔ کا بانکپن
یا فراقؔ اور ناصرؔ کا رنگِ سخن
فکر سردارؔ کی اور اختر ؔ کا فن
ہے ترے ہی وسیلے سے ہم پر عیاں
میری پیاری زباں ،میری اردو زباں

یہ حقیقت کا اظہار ہے برملا
جب ہوا تجھ میں آغاز ’’شب خون‘ ‘کا۱۰؎
تو نیا ذائقہ، تُونے ہم کو دیا
پہنچی نارنگؔ تک اب تری داستاں ۱۱؎
میری پیاری زباں ،میری اردو زباں

میں بھی تیرا ہی ممنون ومکفول ہوں
اس لیے تیری خدمت میں مشغول ہوں
اور تیری بدولت ہی مقبول ہوں
تجھ سے حاصل ہوئی مجھ کو تاب وتواں
میری پیاری زباں ،میری اردو زباں

اشارے

۱؎ پنڈت رتن ناتھ سرشارؔ،ڈپٹی نذیر احمد،مرزا ہادی رسواؔ،عبدالحلیم شررؔ۔
۲؎ منشی پریم چند۔۳؎قرۃالعین حیدر،سعادت حسن منٹو،راجندر نگھ بیدی۔
۴؎مولوی عبدالحق۔۵؎ پنڈت برج موہن دتاتریہ کیفیؔ۔
۶؎ محی الدین قادری زورؔ،امتیاز علی خان عرشیؔ،محمود شیرانی،نصیرالدین ہاشمی۔
۷؎ خواجہ احمد فاروقی،قاضی عبدالودود،مالک رام۔
۸؎گیان چند جین،کالی داس گپتا رضا،رشید حسن خان، جمیل جالبی۔
۹؎ مولانا محمد علی جوہرؔ۔۰؎ ۱ شمس الرحمان فاروقی کا رسالہ۔۱۱؎گوپی چند نارنگ

شناسائی ڈاٹ کام پر آپ کی آمد کا شکریہ! اس ویب سائٹ کے علمی اور ادبی سفر میں آپ کا تعاون انتہائی قابل قدر ہوگا۔ براہ کرم اپنی تحریریں ہمیں shanasayi.team@gmail.com پر ارسال کریں